返回列表 回复 发帖

ꀞꇰꑮꃀꉛ.(巴格借妻)

ꀞꇰꑮꃀꉛ.(巴格借妻)
ꁰꄻꊥꇫꌠ:     ꇁꂷꏂꊞ    ꀐꄸꄲꑳ
1.ꀞꇰꉉ:ꃅꊨꄉꉉ,ꀃ,ꍰꄷꇨ,ꌞꊿꆹꌧꇐꐥ,ꁱꂷꑴꂷꌧꐛꅹ,ꑮꃀꋍꄷꐛꌠꌐꀋꉆ,ꄷꀋꁧꑮꃀꌌꐯꇕꌐ.ꉡꆹꁱꂷꀋꌧ,ꌧꇐꀋꐥꐛꅹ,ꑮꃀꉬꑻꒃꇬꐯꇯꉠꄹꐛꀋꆅꃅꁧꌐ,ꀃꑍꋍꄮꇬꌧꇐꀋꐥꃅ,ꌺꇰꏸꈌꅍꑘꀉꄂꃅꑲꌧꑠꆹꀈꈥꅐꀐꌠꉬꅊꇈ.ꉛ…..ꉛ(ꑳꉨꅉꃅꀱꀁꇬꇁ,ꀧꄹꑳꅝꑳꂾꑌꄉꉌꐒꇯ).
2.ꀉꂿꉉ:ꀇ….ꀆ…ꀞꇰꀋ…
3.ꀞꇰꉉ:ꀉꂿꀋ,ꅽꇭꀧꋍꇅꁦꉘꃅꐙꐚꇆ?
4.ꀉꂿꉉ:ꀃ,ꀞꇰꀋ,ꉡꆹꈍꃅꑌꁦꉘꃅꐙꇁꀋꉆꀐꌠꇆ.
5.ꀞꇰꉉ:ꀉꂿꀋ,ꈍꃅꁦꉘꃅꐛꇁꀋꉆꄷꌠꄜ?ꅽꆅꋍꑵꀋꉬꇆ,ꃆꏂꑋꉢꆏꏁꀊꅑꆅꉚꅉꇬꉜꒉꑲꆏꁦꉘꃅꇁꌠꉬ.
6.ꀉꂿꉉ:ꀞꇰꀋ,ꉡꆹꉌꂵꉪꅍꀉꑌꃅꐥ,ꅽꑮꃀꋍꑋꑍꒃꇬ,ꆏꌺꇰꌧꅍꀋꐥꄷꁧꌐ,ꈍꄮꇬꑲꆀꑮꃀꂷꆏꒃꌊꇁꄎꂯ?ꉢꉪꇬ,ꑮꃀꂷꐥꍂꃅꑌꆏꋋꑮꇁꀋꄐꏭꐛ,ꉠꉌꂵꆅꐨꑠꆹꆅꉚꅉꇬꑌꇬꉚꀋꄐꌠ.
7.ꀞꇰꉉ:ꀉꂿꀋ,ꉠꑮꃀꑠꆹꆏꉌꂵꐒꄸꀋꅐ,ꀃꑍꋍꄮꑶꑳꅝꀿꌐꀋꉆ,ꎧꅝꎧꑱꄉꅉꀕꃅꃆꅿꅥꌠꌐꀋꉆ,ꊱꅞꊱꐯꄉ,ꑮꃀꐣꁙꂷꈁꐛꅉꃅꎆꃀꋌꈐꌊꅞꇧꎭꌐꌠꌐꀋꉆꃅꐥꌠꉥ,ꋋꈨꑮꃀꆹꄚꉢꌟꃅ,ꀋꎪꀋꑴꃅꑘꃅꊖꑣꋍꑠꄈꑌꉌꃹꌠ.ꆏꋌꀋꑇꑲꆏ,ꉜꄉꉏ,ꉢꀃꑍꀉꄂꃅꑮꃀꂷꏃꆏꀦꀋꇁꇂ.
8.ꀉꂿꉉ:ꉢꋌꀋꑇꂼ,ꑠꉬꄷꆏꆏꀒꁨꒉꉏ,ꑮꃀꂷꆏꏃꇁꄷꆏꉡꑌꌦꄚꀐ.
9.ꀞꇰꉉ:ꍑꑴ,ꀉꂿ,ꆏꑬꆏꀁꇬꑋꄉꇈ,ꉢꀃꑍꆏꑮꃀꂷꏃꀁꇬꇁꂿ.(ꈝꃀꈢꄉꉨꅉꉉꅉꃅ,ꀃ,ꉢꀋꃃꌌꆹꅇꉉꉠꀉꂿꉌꌒꄀꂿꉂꄉ,ꑮꃀꂷꏃꇁꂿꄷꌠ,ꑠꉬꑴꇬꏦꎫꇬꌋꅪꈧꌠꆹ,ꉢꂿꄷꆏꁈꃅꁈꇱꀋꏦ,ꉛ,ꑮꃀꉠꄹꐛꀋꅲꌠꆹ,ꀉꂿꒉꄸꀋꉬ,ꀉꄉꒉꄸꑌꀋꉬꌠ,ꀃ,ꑮꃀꀋ,ꆏꇿꐥ?ꆏꇿꐥ?ꉠꅿꑮꃀꇿꐥꇆ?ꉪꍏꇩꏓꈈꁌꍤꇬ,ꌺꃰꋍꂷꁦꎆꄷ,ꋋꂷꆹꈍꃅꑌꉢꉬꀐꌠ(ꉩ),ꉛ,ꑮꃀꇆ,ꑮꃀ,ꆏꇿꐥ,ꉠꅿꑮꃀꇿꐥꇆ?
10.ꃷꇎꉉ:ꉎꑴꀞꇰꀋ,ꆏꄚꄉꈌꃶꂿꋯꑡꀕꉉꅷꐺꌠꀋ?
只要活著一天,我們就應奉獻自己;為了全人類、全世界、全宇宙的美好與進步而努力。-我們的眼界必須放遠,遠過於生命的侷限;必須高雅,高雅到不惜一切犧牲;必須偉大,偉大到無所畏懼。
11.ꀞꇰꉉ:ꑮꃀꀋ,ꑮꃀ,ꉠꅿꑮꃀꇿꐥꇆ?
12.ꃷꇎꉉ:ꀊꀒ--ꆎꆹꑮꃀꂷꒃꂿꄷꃶꁧꄉꏽꃅꄚꑌꂷꉬꅊꇈ,ꄚꆏꑮꃀꂷꑡꐒꀋ?
13.ꀞꇰꉉ:ꑮꃀꉢꉂꌠꀋꉬꇆ,ꉠꀉꂿꉂꌠꇆ,ꉢꈍꃅꀋꐒꉆꂯ?ꀋꐒꑲꆏꀋꃅꉠꑮꃀꂷꆏꉜꇿꐥꄉꇆ?
14.ꃷꇎꉉ:ꄚꑠꃅꑲꆏ,ꆏꃷꇎꅍꈁꇁꉈꃅꑮꃀꂷꉛꌊꅽꀉꂿꀨꒉꑲꆏꍑꀐꃅꄉ.
15.ꀞꇰꉉ:ꈀꄸꄰꑮꃀꂷꄸꊾꉛꂷꐥꇆ,ꑠꉬꄷꆏꅽꑮꃀꄸꇕꉬꑍꉡꉛꇬꈍꃅꐙꂸ?
16.ꃷꇎꉉ:ꀒ,ꉠꑮꃀꄸꆎꉛꇬꍑꆹꍑꑴꇆ,ꄚꉠꑮꃀꆹꀁꇬꀋꐥ,ꀋꄹꉇꑲꆀꋍꀉꂿꄰꅍꁧꇬꀱꀁꇬꀋꇁꌦ.ꑠꃅꑴꇬꉡꆹꏡꁈꏢꐥ,ꉢꉉꆎꇰꂿ.
17.ꀞꇰꉉ:ꇯꐯꃅꄜꅀ,ꑡꏡꁈꏢꇆ,ꐳꃅꉉꎼꇁ.
18.ꃷꇎꉉ:ꄚꆏꎆꑍꇯꆹꐤꂷꉬꀐ,ꀊꅑꐰꇓꋒꊁꆈꍶꁮꎧꑱꄷꑠꂷꐥ,ꋋꂷꆹꅉꀕꃅꊱꅞꊱꐯ,ꎧꅝꎧꑱꇬꎷꄉꎆꀉꄂꈀꂷꉬꀐ,ꆏꎆꍈꎼꋌꁳꇬꆹ,ꈍꃅꑌꋍꑮꃀꋌꄸꆎꉛꀐꌠꉬ.
19.ꀞꇰꉉ:ꇯꐯꃅꄜꅀ?ꑠꃅꄷꆏꉢꊼꇅꇫꎖꉚꒉꂿ.
20.ꍶꁱꎧꑱꎧꅝꄉꉉꆹꉇꆹꃅꉉ:ꀃ,ꑮꃀꆞꇬꄉꈐꌊꇁꌠꎆꃀꑠꆹꌋꀋꐊꅀꑞꃅꀋꐚ,ꋍꃢꀉꄂꃅꌞꊿꅞꌊꁧꌐꀐ,ꉢꋌꎼꑲꇤꂯꅝꅍꀋꊌꃅꄚꄉꀐꍰ.ꈔꇇꋋꁆꅑꌠꅀ,ꌊꈱꇇ,ꌋꋠꇇꋋꁆꇽꇫꎭꂿ,ꍰ,ꍰ,ꉛ!ꉠꑮꃀꆞꀉꆈꀊꋨꈬꇬꎆꃀꑍꇰꀀꌠꌡꑴꌦ.ꉢꀃꂰꆏꋋꑍꇯꈐꌊꄉꋍꃢꅞꒉꀱꌦꇈ,ꀋꑍꊂꉠꃤꌞꊿꅞꌊꒉꌐꋋꈨꀱꌊꇁꌐꂿ.
21.ꊞꈬꂾꑲꌩꄉꇈꁦꋠꏭꍃꏽꄉꉉ:ꀋꇷꀒ,ꊿꋒꏭꀋꋒ,ꍶꁱꎧꑱꑠꂷꋒ,ꏃꃅꉬꉎꐥꌠꑓꋪꇬꀋꅑꀐꌠꀞꂼ,ꉠꑠꀕꂷꑌꎭꈓꈀꄸꀕ,ꌞꁦꋠꆹꐥꃅꐥꅌꀉꄂꌆ,ꊫꂫꃰꇌꀉꄂꏂꇫ,ꉠꁦꋠꆹꋍꑍꌠꎧꅝꎧꑱ,ꊱꅞꊱꐯꇬꎷꑠꂷ,ꋌꀋꃃꊁꄻꀋꀱꇬꆹꉣꑊꐯꇯꐥꅷꃀꀋꌠꀐꌠꉬ.
22.ꍶꁱꊉꋩꊇꑐꃅꉉꄉꑮꃀꆞꇬꎆꃀꈐꆹ
23.ꊞꈬꂾꃃꋪꀕꃅꑲꌩꄌꌊꁦꋠꏭꅥꆹꄉꉉ:ꉎꑴ,ꆏꑡꃅꏢꉨꀋ?ꁦꋠꎲꀋꑌꋋꏢ,ꀋꑍꉠꆞꇬꀀꌠꎆꃀꀊꋨꑍꄙꃪꆏꈐꌊꇿꁧꌐꀐ?
24.ꍶꁱꉉ:ꆏꈍꃅꑠꃅꉉꇆ?ꄚꉣꑊꁦꋠꃆꅿꑋꂷꐯꇯꐥꇬ,ꈍꃅꈐꄷꉉꌠꄜꀋ?ꈐꆹꂯꀋꈐꇆ,ꌌ….ꌌ…ꌌꆹꉢꌌꇁꀐꇆ.
25.ꊞꈬꂾꉉ:ꉛ,ꁦꋠꑊꏦꀋꇮꑠꏢ,ꌌꇁ,ꉠꎆꃀꆏꌌꇿꎭꒉꌠꀱꌊꇁ.ꀱꌊꇁ….
26.ꍶꁱꉉ:ꅽꆞꀉꆈꀊꋨꏢꇬꎆꃀꑍꇯꀀꑴꌦ,ꉢꋋꑍꇯꌌꋍꃢꅞꒉꌦꇈ,ꀋꑍꊂꉠꃤꊿꅞꌊꁧꈧꌠꀱꌊꇁꂿ,ꆏꇨꇅꄡꃃꃅꄉꇆ.
27.ꊞꈬꉉ:ꉛ!ꆏꀋꃅꄡꇗꑠꃅꅞꁧꏢꉨꑴꌦꅀ.ꂴꈧꌠꀱꌊꇁꄷꀋꁣꊁꈧꌠꇯꌠꅞꌊꁧꌦꇬꆏꋋꌦꀋꄐꇮꑴꂼ,ꆏ…ꆏ…ꁨꁧ,ꁧ,ꅽꈀꅐꅉꇬꅐ,ꀱꄚꉠꀁꇬꄡꇁꀐ,ꁧ,ꁨꁧ.
28.ꍶꁱꉉ:ꀊꑴ--ꑞꉬꄷꀋ?ꆏꄈꑌꉌꂵꀀꀋꊭꃅꑠꇯꈌꐚꅊꇈꀒ,ꄚꑳꋋꂷꅽꃤꂷꄷꌠꅀ?ꆎꆹꂯꎆꁵꄉꉢꃼꌊꇁꌠ,ꉠꏯꑠꃅꉉꇬꅽꈲꅍꇬꀋꐥꋭꀋꂸ.ꆏꄈꉠꌌꁈ,ꆏꄈꉠꌌꁈꀋ,ꉛ!ꀑꀋꄐꃅꑠꇯꈌꐚ.
29.ꊞꈬꂿꃃꌦꄉꏽꃅꉉ:ꉬꑴꇆ,ꉠꉌꂵꀀꀋꊭꌠꀋꃅꑲꆀꆏꅉꐚꅀ?ꉡꆹꃅꄜꄑꃅꈊꑟꌠ,ꀋꀀꀋꑌꃅꀕꌋꆏꁳꌐꇬ,ꆏꉜꇬꋍꑵꃅꀋꐛ(ꃃꐯꃃꃅꋍꃢꅥ)ꍰ….ꍰ…ꉢꆎꏦꌠꅀ?
30.ꍶꁱꉉ:ꉡꑌꆏꀋꏦꌠ,ꁧ,ꆏꄈꑌꁨꁧ,ꅽꀉꄉꅍꁧ,ꅽꀉꂿꅍꁧ,ꍰ…ꍰ…
只要活著一天,我們就應奉獻自己;為了全人類、全世界、全宇宙的美好與進步而努力。-我們的眼界必須放遠,遠過於生命的侷限;必須高雅,高雅到不惜一切犧牲;必須偉大,偉大到無所畏懼。
31.ꊞꈬꉉ:ꆏ…ꆏ…ꉡꆹꈍꄮꑲꆀꋠꂊꈚꊸꇁꉚ,ꈍꄮꑲꆀꌞꊿꏭꀋꋌꃅꐥꂾꉂ,ꆎꆹꋍꑍꌠꎧꅝꎧꑱ,ꊱꅞꊱꐯ,ꉛ--ꉛ---ꑳꉨ.
32:ꀞꇰꀃꈄꅥꄉꉉ:ꊿꇫꐥꀕ?(ꇠꀕ)ꊿꇫꐥꀕꀒ?
33.ꍶꀱꉉ:ꆏꄡꉩꇬꍑꀕꀋ?ꀊꅑꈀꄸꂷꀃꈈꅥꉏꇆ?
34.ꊞꈬꉉ:ꉢꋌꇛꅀ,ꅽꏸꑭꆹꀋꐔꑲꆏ,ꅽꊨꏦꇬꉚꒉꌦꐥ.
35.ꍶꁱꉉ:ꀃ,ꆎꄻꑠꃅꄉꂸ,ꉢꇬꉚꒉꂿ.
36.ꀞꇰꉉ:ꍶꁱꎧꑱꄷꌠꆏꉫꉬꇆ?ꉡꆹꀞꇰꂓꌠ.
37.ꍶꁱꉉ:ꊿꉠꏯꍶꁱꎧꑱꄷꉉꌠꐥ,ꆏꑡꌤꍈꐥꀋ,ꈴꀒꁨꑌꄉꉉꇁ.
38.ꀞꇰꉉ:ꉢꆍꏤꅍꌤꍈꐥꇆ,ꊞꈬꉉ:ꂸꊨꂶꌠꀋ,ꒉꊸꍈꅝ.ꀞꇰꉉ:ꀒ,ꍑ,ꍑ.ꍶꁱꉉ:ꆏꀋꃅꑌꋙꃅꀋꒉꌦꅀ?ꊞꈬꂾꋚꃅꒉ.
39.ꍶꁱꉉ:ꄚꃺꃶꆏꑞꌤꍈꐥꌠꉬꄷꀋ?
40.ꀞꇰꉉ:ꉢ---ꉢ---ꀃ.
41.ꍶꁱꉉ:ꀊꆾ,ꐳꃅꁨꉉꇆ,ꆏꑡꂷꉉꀋꌒꅍꐥꇆ.ꆏꑡꎹꌠꉢꐥꑲꆏꄻꆏꁳꌦꐥ,ꆎꆹꎆꐥꌠꉥꑞꑌꉉꌒꌠꀋꂸ.
42.ꀞꇰꉉ:ꎆꆹꉢꐥꑴꇆ,ꉢ…ꉢꅽꑮꃀꉛꇁꌠꇆ.
43.ꍶꁱꉉ:ꑡꉬꄷꀋ?ꆏꀉꁁꆏꀋꉛ,ꄧꀕꃅꉠꑮꃀꉛꇁ,ꆏꅽꈂꁆꏡꌠꂨꐯꇯꄉꇬꍑꍓꉏ?ꊿꑮꃀꂷꄸꐮꉛꂷꇿꐥꉏꑠꈍꑋꆏꂿꋺ?ꊾꇰꏭꀋꇰ,ꊾꇰꃅꇰꂷꉬ,ꂯꑌꀞꇰꂓ,ꇯꑌꇯꍝꃅꇰꂷꉬꅊꇈ,ꅽꉂꆏꎆꐥꑲꆏꑞꑌꃅꉆꌠꉬꎼꈀꅀ?
44.ꀞꇰꉉ:ꉢꉛꌠꀋꉬꇆ,ꉠꀉꂿꉛꌠꇆ,ꉠꀉꂿꂶꌠꉢꑮꃀꂷꀋꐥꐛꅹꉌꐒꄉ,ꈤꏠꌌꈫꁁꂷꀉꄂꋒꀐ,ꉡꆹꉠꀉꂿꁳꉌꐒꂿꀋꉂꄉ,ꑠꃅꅽꑮꃀꉛꇁꌠ,ꅽꑮꃀꁳꉠꑮꃀꂷꉫꎴꀕꃅ,ꉡꐊꄉꉪꏤꅍꉬꑍꃘꑍꂷꐥꂿꉂꌠꇆ.
45.ꍶꁱꉉ:ꀒ,ꆏꑮꃀꉛꌠꆹꅽꀉꂿꒉꄸꃅꉛꌠ,ꑮꃀꂷꉛꌊꅽꀉꂿꊏꒉꂿꄷꌠꅀ,ꆎꑌꀿꃀꁌꒉꂷꉬ,ꑠꃅꇬꆹꂯꊼꇅꁈꀋꐥ,ꄚꈍꃅꑌꉪꏤꅍꄉꀉꉘꏢꃅꐥꑲꆀꍑꌠꀒ.
46.ꀞꇰꉉ:ꆏꑡꈨꏤꌠꁨꏤꌦꐥ,ꅽꑮꃀꄻꉡꉛꑲꆏ,ꆏꈍꑋꑵꏤꄉꑌꉡꆹꉉꅍꀋꊌꀐꌠ.
47.ꍶꁱꉉ:ꉢꏤꅍꆹꀉꑌꃅꀋꐥ,ꑮꃀꉚꁌꆹꋍꑍꌠꋍꉐꃪꄸꉢꁳꌦꐥ,ꆍꏤꅍꄉꇬꆹꉠꑮꃀꇬꅥꀋꉆꌠꉬꄷꀋꁧꏮꉠꑮꃀꇬꉜꄉꒉꀋꉆꌠꉬ.
48.ꀞꇰꉉ:ꍑꐯꍑ,ꄚꇬꅽꑮꃀꇫꉬꅱꅲꀋꐚꀐꂼ?
49.ꍶꁱꉉ:ꀋꏦ,ꀋꏦ,ꉢꎔꃅꋍꏭꉉꒉꂿ.ꉐꑴ,ꑮꃀꀋ,ꉢꋍꑵꍈꉉꆎꇰꂿ.ꊞꈬꂾꉉ:ꑡꍈꉬꀋ?ꍶꁱꉉ:ꀊꅑꊾꇰꀊꋨꏢꎆꐥꇬꋍꋋꌬꀋꄐꃅꋌꌌꉡꍈꇁꀐꇆ.
50.ꊞꈬꂾꉉ:ꑞꉬꄷꀋ?ꆏꌞꊿꏭꉮꂾꉂꌦꀐꅀ?
只要活著一天,我們就應奉獻自己;為了全人類、全世界、全宇宙的美好與進步而努力。-我們的眼界必須放遠,遠過於生命的侷限;必須高雅,高雅到不惜一切犧牲;必須偉大,偉大到無所畏懼。
51.ꍶꁱꉉ:ꉢꋍꏭꉮꌠꀋꉬꇆ,ꉡꆹꋍꏭꇇꀨꌠꇆ.
52.ꊞꈬꂾꉉ:ꀃ---ꆏꌟꃅꑠꑌꌞꊿꇬꇇꀨꇮ,ꌞꀂꏾꌎꄉꌞꀑꆊꀖꂾꉂꌦꀐꌠ.ꆏꉉꉏ,ꋌꑢꎹꇁꌠꉬꄷꀋ?
53.ꍶꁱꉉ:ꋋꆹꉪꏤꅍꋍꑵꍈꉛꇁꌠꉬꄷ.
54.ꊞꉉ:ꌞꁦꋠꋋꂷꉜꎼꇁꇬꉽꂷꉬꇆ,ꋌꑡꉛꌠꎼꋋꉛꌦꐥꀋꅲ.
55.ꍶꁱꉉ:ꄚꉡꆹꆏꇫꉬꀋꅲꌠꏦꇆ.
56.ꊞꈬꂾꉉ:ꉢꇫꉬꀋꅲꏦꄷ,ꆏꀋꃃꌌꉉꌠꀋꉬꅀ.ꉡꆹꎆꁵꄉꆏꃼꄉꌠꉬꄷ,ꆎꆹꉠꌌꁈꉬꄷ,ꑳꋋꂷꇬꆏꉉꑲꆏꌗꌠꀋꉬꅀ?ꉡꆹꌗꅍꀋꐥꌠꇆ,ꅽꉪꅌꇬꈴꄉꃅꑲꆏꍑꃅꄉ.
57.ꍶꁱꉉ:ꋌꉛꇁꌠꉪꏤꁨꇖꈧꌠꀋꉬꇆ.
58.ꊞꈬꂾꉉ:ꋌꉛꇁꌠꉪꏤꁨꅍꈧꌠꀋꉬꑲꆏꑡꈨꉬꀋ?
59.ꍶꁱꉉ:ꋌ…ꋌ…ꋌꆎꉛꇁꌠꇆ.
60.ꋌꉡꉛꇁꄷ,ꋌꉡꉛꌊꑞꃅꄜ?ꑠꃅꆏꀕꈍꃅꉉ?
61.ꍶꁱꉉ:ꉢꆎꄻꋋꉛꐮꄉꀐꇆ,ꋌꋍꑍꌠꆏꉛꁌꋍꉐꃪꄸꉢꁳꐮꄉꀐ.
62.ꊞꈬꂾꉉ:ꆏ….ꆏ…ꉡꄻꋋꉛꐮꄉꌠꄜꀋ?ꁦꋠꊾꁘꅽꑠꏢ,ꁦꋠꀉꑐꉌꒃꇀꏢꌟꃅ,ꆏꎆꈁꑲꆏꇗꅉꏦꃤꀋꈁꀐꅀ?ꌞꁦꋠꆏꌟꃅꑠꇿꐥꉏ?ꆏꎆꈁꑲꆏꑮꃀꇯꄸꊾꉛ,ꀋꇷ,ꉢꀋꉆꇯꑞꃅꅽꑠꂷꄷꐛꇁꌠꉬꂯ?ꉪꅉꃃꅉꑟ,ꌞꊿꆹꀎꇓꋍꑮꃀꈪꋌꄀꌠꏦ,ꆎꆹꅽꊨꏦꀎꇓꊨꏦꈪꅑ.
63.ꍶꁱꉉ:ꉢꆎꄻꋋꉛꋋꏢꇗꅉꆹꀋꉬꑴꇬ,ꄚꆏꃷꋌꁳꇧꎭꈨꑌꀋꉬ,ꉛꀉꄂꉛꌠꉬ,ꆏꋍꏤꅌꄉꇬꋍꀉꂿꂴꄉꋍꑮꃀꀋꉬꑌꑮꃀꉬꎴꀕꃅꄉ,ꑓꐛꇖꍈꄻꀉꂿꀨꑲꆏꍑꀐꃅꄉ.
64.ꊞꈬꉉ:ꁦꋠ….ꁦꋠꑊꏦꀋꇮ,ꄚꉢꋋꂷꆹꑡꂷꄷꌠꀋ,ꎊꈬꂶꄉꌌꌟꉛꇬꑽꀋꐥꄷꌠꅀ?ꉡꆹꑠꀋꃅꌠ,ꆏꑊꏦꀋꇮꇬꉡꆹꑊꏦꇮꌠꉬ.
65.ꀃꀂ,ꀃꑍꆹꆏꈍꃅꉉꄿꂿ,ꌤꋋꐘꆹꉢꈍꃅꑌꃅꌠ,ꀋꄸꄷꅽꉌꂵꉢꉨꑲꆏ,ꆏꇿꐥꑌꉠꑮꃀꂷꉬꀋꅲ.ꋋꑌꋍꑍꌠꉛꁌꋍꉐꃪꂷꆹꄸꉢꁳ,ꌞꊿꎆꌌꉠꈂꀸꊐꇁꇬꉢꎆꀋꋠꑲꆏꉢꃮꂷꆹꀋꉬꀐ.ꋋꑌꑞꂷꐥꑴꌦꂯꀋ.
66.ꊞꈬꂾꉉ:ꉛ!ꉬꑴ,ꆏꉜꇬꑠꃅꐙꑲꆏ,ꉢꋋꐊꁧꌦꐥꀋꅲ,ꊂꋍꑍꑲꆀꉢꀀꃀꈴꀋꄿꃅꑠꆹꄡꉉꅊꇈꂸ.
67.ꍶꁱꉉ:ꀞꇰꀋꉠꑮꃀꆹꉢꇴꌊꇁꀐ,ꀋꃃꌌꉠꏤꅇꈧꌠꆹꎺꄉꈍꃅꑌꃅꇫꑟꅊꇈꂸ.
68.ꀞꇰꉉ:ꀃ,ꀁꑳꀋ,ꑠꆹꆏꉌꐒꄻꀋꅐ,ꉢꈍꃅꑌꅽꏤꅇꋋꈨꇬꈴꄉꃅꇫꑟꅉꈫ,ꋍꁮꆪꐛꑲꆏ,ꉢꅽꑮꃀꑕꃅꍈꑌꀁꋌꀋꒊꃅꏃꆏꁳꇁꅉꈫꂸ.ꍰ,ꉢꀋꃅꇯꂴꋍꁮꆪꃤꌕꄙꃪꄸꆏꁳꄉꇈꂿ,ꅽꂴꋍꇅꃷꉚ.
69.ꍶꁱꉉ:ꃷꌊꀋꌸꀐ,ꑡꂷꃷꇆ,ꑠꉬꆏꆐꑊꀅꌳꃅꁧꅊꇈꂸ.ꉎꉐ….ꉐ…ꈝꐮꃅꎆꃀꌕꄙꃪꉢꎼꇇꈓꊐꌦꀐꍰ.ꉐ…ꉐ…ꑷ,ꋋꌕꄙꃪꌌꊱꅞꅉꇬꄉ,ꀋꑍꊂꉠꃤꌠꅞꌊꁧꀊꋨꑍꄙꃪꀃꑍꆏꉆꄙꃪꃅꅞꌊꀱꇁꂿ.
70.ꀞꇰꉉ:ꊞꈬꂾꀋ,ꇯꍝꃅꇬꆹꉡꑌꃅꅍꎷꀋꊌꃅꑠꃅꀕꌠꇆ.
只要活著一天,我們就應奉獻自己;為了全人類、全世界、全宇宙的美好與進步而努力。-我們的眼界必須放遠,遠過於生命的侷限;必須高雅,高雅到不惜一切犧牲;必須偉大,偉大到無所畏懼。
71.ꊞꈬꂾꉉ:ꀃ,ꂛꊨꂶꌠꀋ,ꆏꑡꂓꌠꇆ?
72.ꀞꇰꉉ:ꉢꀞꇰꂓ,ꀞꆏꃆꀞꄷꀞ,ꇰꆏꌺꇰꄷꇰ.
73.ꊞꈬꂾꉉ:ꉎ….ꉐ…ꄚꆏꑞꃅꑮꃀꉛꌠꄜ?
74.ꀞꇰꉉ:ꀃ,ꉠꀁꇬꀉꂿꂶꌠꅉꀕꃅꎷꄜꑌꀋꃪ,ꉡꆹꌺꇰꌧꅍꑌꀋꐥꄉ,ꑮꃀꉬꑻꒃꇬꐯꇯꉠꄹꐛꀋꅲꄉꀱꁧꌐ,ꑠꅹꉠꀉꂿꆹꈜꀕꀊꅰꆅꇬꎷ,ꋌꉉꇬꉢꑮꃀꂷꏃꌊꇁꑲꆏ,ꀁꆹꌦꇬꑌꌦꄚꀐꄷ,ꅉꀕꑠꃅꉉꇬꎷꄉ,ꉡꆹꃅꅍꎷꀋꊌꃅꑠꃅꀕꇬꎷꌠ.
75.ꊞꈬꂾꉉ:ꀒ!ꑠꉬꅊꇈ,ꄚꑠꉬꅊꑲꆏꀕꀋꃃꌌꎆꈨꑡꂷꅐꂯ?ꋋꈨꆹꎆꀋꅐꃅꄉꅽꏯꇇꀨꇬꑌꍑꈨꉬꃅꄉ.
76.ꀞꇰꉉ:ꎆꈨꆹꂯꑽꀋꐥ,ꉢꆏꁳꉠꀉꂿꂴꄉꉠꑮꃀꂷꉬꎴꀕꃅꄉꌠꌤꋋꐘꅽꃀꈴꀋꄿꀐ,ꊞꈬꃀꀋ.
77.ꊞꈬꃀꉉ:ꀉꁣ,ꑽꀋꐥ,ꑽꀋꐥ,ꄚꇬꉣꑊꆹꀋꃅꇯꆐꉉꇰꅲꈴꃅꄉꌶ,ꅽꀉꂿꂴꄉꇬꆹꉢꅽꑮꃀꂷꃅꄉ,ꅽꀉꂿꇬꀋꐥꅉꇬꆹꆎꆹꉠꇅꀠꂷꃅꄉ,ꉢꅽꄹꄉꇪꇁꌠ,ꆏꉠꄹꑡꑌꉪꀋꉆꌠ.
只要活著一天,我們就應奉獻自己;為了全人類、全世界、全宇宙的美好與進步而努力。-我們的眼界必須放遠,遠過於生命的侷限;必須高雅,高雅到不惜一切犧牲;必須偉大,偉大到無所畏懼。
哪怕系统升到了win10,360浏览器还是框框框。
真诚的声音才能温暖人心。。。。。。
回复 5# 阿瑟

ꉜꌒꊱꀋꂼ,ꉈꑴꐥꀕꌥ?
ꃅꃴꌩꂱ
返回列表